BAG მხარდაჭერას უცხადებს საქართველოს ხელისუფლების მიერ კორონავირუსთან ბრძოლის პროცესში გადაგმულ ნაბიჯებს

10 მარ '20

საქართველოს ბიზნეს ასოციაცია მხარდაჭერას უცხადებს საქართველოს ხელისუფლების მიერ კორონავირუსთან ბრძოლის პროცესში გადაგმულ ნაბიჯებს. 

ასოციაცია, როგორც ქვეყანაში მოქმედი ყველაზე მსხვილი ბიზნესგაერთიანება, ასევე მიესალმება კორონავირუსთან დაკავშირებით მოქმედი უწყებათაშორისი საკოორდინაციო საბჭოს მიერ გაცემულ რეკომენდაციებს და მოუწოდებს ყველა მოქალაქეს, პირველ რიგში კი ბიზნესსექტორში ასი ათასობით დასაქმებულებსა და საქმიანი წრეების წარმომადგენლებს - სრულად დაიცვან კორონავირუსის გავრცელების წინააღმდეგ მიმართული რეკომენდაციები.

საქართველოს ბიზნეს ასოციაცია ერთ-ერთი პირველი გამოეხმაურა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ინიციატივას, საჭიროების შემთხვევაში ხელი შეგვეწყო დასაქმებულთა თვითიზოლაციისათვის, შრომითი ურთიერთობების შეჩერების, შეწყვეტის ან შრომის ანაზღაურების ვერმიღების რისკების გარეშე. ასოციაციამ მყისიერად გაითვალისწინა უწყებათაშორისი საბჭოს რეკომენდაციები, რის საფუძველზეც გარკვეული პერიოდის განმავლობაში, ვითარების ნორმალიზაციამდე უარი ითქვა ნებისმიერი სახის საჯარო შეხვედრებისა და ღონისძიებების ჩატარებაზე.

საქართველოს ბიზნეს ასოციაცია იმედს გამოთქვამს, რომ კორონავირუსით გამოწვეული სოციალური და ეკონომიკური სირთულეები დაძლეული იქნება საქართველოს მოსახლეობის ერთიანი ძალისხმევითა და თანადგომით. თითოეულმა ჩვენგანმა, პირადად უნდა ვიკისროთ ჩვენი წილი მოქალაქეობრივი პასუხისმგებლობა საზოგადოების, ერთმანეთის წინაშე, ვიყოთ კიდევ უფრო მეტად სოლიდარულები, დარაზმულები და ორგანიზებულები ამ დროებითი საფრთხის ნეიტრალიზაციისათვის.