BAG გართულებულ ეპიდემიოლოგიურ ვითარებას ეხმიანება
27 ნოემ '20
საქართველოს ბიზნეს ასოციაცია გართულებული ეპიდემიოლოგიური ვითარების შედეგად გამოწვეულ ახალ შეზღუდვებს ეხმიანება. ასოციაცია, როგორც ასობით ბიზნეს ოპერატორის ინტერესების დამცველი ყველაზე მსხვილი გაერთიანება, სამწუხარო ფაქტად მიიჩნევს იმას, რომ მნიშვნელოვანი შეზღუდვების გარეშე ვერ მოხერხდა ახალი კორონავირუსის გავრცელების შეკავება. ბუნებრივია, საქართველოს მთავრობის მიერ შემუშავებული დამატებითი შეზღუდვები ნეგატიურ ზეგავლენას იქონიებს ბიზნეს ოპერატორების საქმიანობაზე და შესაბამისად ეკონომიკაზე.
ამავდროულად ავღნიშნავთ, რომ საქართველოს ბიზნეს ასოციაციისთვის, როგორც მაღალი სოციალური პასუხისმგებლობის მქონე ბიზნეს კომპანიების ერთობისთვის, ჩვენი ქვეყნის თითოეული მოქალაქის სიცოცხლე ყველაზე ძვირფასი და უმაღლესი ფასეულობაა, რომელიც საჭიროებს განსაკუთრებულ დაცვას მიუხედავად იმ მაღალი ფასისა, რომლის გადახდაც ყველას, ბიზნეს სუბიექტსა თუ რიგით მოქალაქეს ერთობლივად მოგვიწევს.
საქართველოს ბიზნეს ასოციაციაში მუდმივად ვსაუბრობდით იმ სირთულეებზე, რომლებიც ჯერ კიდევ შეზღუდვების გეგმის გამოცხადებამდე პანდემიის მეორე ტალღის შედეგად შეექმნა ბიზნესს. გლობალური პანდემიისა და მსოფლიო ეკონომიკური კრიზისის ფონზე, საქართველოში მოქმედი ბიზნესსუბიექტების მთავარი ამოცანა კომპანიების გადარჩენა და სამუშაო ადგილების მაქსიმალურად შენარჩუნებაა.
აქედან გამომდინარე, მისასალმებელია, რომ საქართველოს მთავრობის მიერ წარმოდგენილმა ეკონომიკის სტიმულირების პაკეტმა გაითვალისწინა საქართველოს ბიზნეს ასოციაციის კონკრეტული შეთავაზებებიც, რომლებიც როგორც ხელისუფლებასთან დისკუსიების დროს ასევე საჯარო სივრცეში ჩვენ რამდენჯერმე დავაყენეთ. კერძოდ, (ა) 750 ლარამდე ხელფასების შემთხვევაში საშემოსავლო გადასახადისგან სრულად განთავისუფლების, ხოლო 1500 ლარამდე არსებულ ხელფასებზე საშემოსავლო გადასახადისგან ბიზნესის ნაწილობრივ განთავისუფლების პროგრამის დამატებით 6 თვით გაგრძელება და (ბ) ტურიზმისა და სტუმართმასპინძლობის სექტორში (ყველა ტიპის სასტუმროები, რესტორნები, ტურ-ოპერატორები და ტურისტული კომპანიები) მოქმედი ბიზნეს ოპერატორებისთვის გადავადებული 4 თვის საშემოსავლო გადასახადის ჩამოწერა.
აღსანიშნავია ის ფაქტი, რომ საქართველოს მთავრობის მიერ წარმოდგენილი დამატებითი შეზღუდვების გეგმა ეკონომიკის მხოლოდ გარკვეულ სექტორებს ეხება, თუმცა 750 ლარამდე ხელფასების შემთხვევაში გადასახდელი საშემოსავლო გადასახადისგან სრულად განთავისუფლებით, ხოლო 1500 ლარამდე ხელფასის შემთხვევაში საშემოსავლო გადასახადისგან ნაწილობრივი განთავისუფლებით უკლებლივ ყველა კომპანია ისარგებლებს განურჩევლად სექტორისა.
საშემოსავლო გადასახადთან დაკავშირებით დაყენებული ჩვენი ორივე თხოვნა იყო უაღრესად კრიტიკული ბიზნესისთვის, ჩვენი წევრები თითქმის ყოველდღიურ რეჟიმში გვიკავშირდებოდნენ ამ საჭიროებებთან დაკავშირებით და ამ თხოვნების გათვალისწინება, ბუნებრივია, არის ძალიან პოზიტიური გადაწყვეტილება.
დასასრულს, კიდევ ერთხელ გვინდა ხაზგასმით აღვნიშნოთ, რომ საქართველოს ბიზნეს ასოციაციის მიერ ხელისუფლების წინაშე წარდგენილი ნებისმიერი შეთავაზება ემსახურება ჩვენს ქვეყანაში სამუშაო ადგილების მაქსიმალურად შენარჩუნებას და პოსტ-პანდემიურ ფაზაში ეკონომიკის დროული აღდგენისთვის ბიზნესის მზადყოფნის უზრუნველყოფას. ამასთან, ავღნიშნავთ იმ ფაქტსაც, რომ შეზღუდვების პარალელურად წარმოდგენილი სტიმულირების პაკეტი არის მხოლოდ ის მინიმუმი, რომელიც დღეს აუცილებელია ბიზნესისთვის და შეიძლება ბოლომდე ვერ ითვალისწინებდეს მის საჭიროებებს. შესაბამისად, საქართველოს ბიზნეს ასოციაცია აქტიურად დააკვირდება შეზღუდვების ახალი გეგმის მიმდინარეობას და ასოციაციის წევრი კომპანიების მოსაზრებების გათვალისწინებით საჭიროების შემთხვევაში წარმოადგენს დამატებით წინადადებებს, რომლებიც შეიძლება გულისხმობდნენ მხარდაჭერისა და სტიმულირების ახალ მექანიზმებსაც.