ბიზნეს ასოციაციები საბანკო ზედამხედველობის სისტემაში დაგეგმილ ცვლილებებს ნეგატიურად აფასებენ

23 მაის '15

„საქართველოს ბიზნეს ასოციაცია”, „ამერიკის სავაჭრო-სამრეწველო პალატა“, „საერთაშორისო  სავაჭრო პალატა“, „ევროკავშირი-საქართველოს ბიზნეს საბჭო“,  „საქართველოს დამსაქმებელთა ასოციაცია“ და „საქართველოს ბანკების ასოციაცია“  უკიდურესად ნეგატიურად აფასებენ უკანასკნელი პერიოდის განმავლობაში ქვეყნის საბანკო სისტემის და ცალკეული კომერციული ბანკების მიმართ გაჟღერებულ, დაუსაბუთებელ ეჭვებს, გარკვეულ სავალუტო სპეკულაციებში ვითომდა მონაწილეობის შესახებ.
ჩვენ ღრმად გვწამს, რომ ჩვენი ქვეყნის თითოეული მოქალაქის, ბიზნესმენის ინტერესია იარსებოს დემოკრატიულ, გამჭვირვალე და სამართლებრივ სივრცეში, სადაც მხოლოდ დასაბუთებული, არგუმენტირებული და დადასტურებული ფაქტები შეიძლება გახდეს სათანადო გადაწყვეტილებების და განცხადებების საფუძველი. სხვა ნებისმიერ შემთხვევაში, მსგავსი განცხადებები შეიძლება აღქმული იქნეს, როგორც ეროვნული ვალუტის კურსის მერყეობის გამო დაზარალებული მოსახლეობის შეცდომაში შეყვანის მცდელობა და ეროვნული საბანკო სექტორის სახით მისთვის „განტევების ვაცის“ შეთავაზება.
ჩვენ ყველამ, ქვეყნის მოქალაქეთა დიდმა ნაწილმა, ძალიან კარგად ვიცით, რომ პრობლემები, რამაც ეროვნული ვალუტის გაუფასურება გამოიწვია, ბევრად სერიოზული და ფუნდამენტურია - ეს არის პრობლემები ეკონომიკაში, განპირობებული რიგი საგარეო თუ საშინაო ფაქტორებით.
უკვე ორ წელიწადზე მეტია, რაც ბიზნეს სექტორი აქტიურად საუბრობს ეკონომიკის სტიმულირებისათვის ისეთი მნიშვნელოვანი რეფორმების განხორციელების აუცილებლობაზე, როგორიცაა: მოგების გადასახადის გაუქმება, კერძო საპენსიო სისტემის რეფორმა, საფონდო ბირჟების განვითარება, კაპიტალის ბაზრების ხელშეწყობა და სხვა.
ამ ფონზე ჩვენთვის სრულიად გაუგებარი და აუხსნელია საქართველოს პარლამენტში ინიცირებული კანონპროექტი  „ეროვნული ბანკის შესახებ“ ორგანულ კანონში ცვლილებების შესახებ, რომლის ძირითადი არსი ეროვნული ბანკისაგან საფინანსო სექტორის ზედამხედველობის ფუნქციის დისტანცირებაა.
თუ გავიხსენებთ უკანასკნელ პერიოდში რიგი ოფიციალური პირების მიერ გაკეთებულ განცხადებებს, საბანკო ოპერაციების შესახებ ინფორმაციის ხელმიუწვდომლობაზე, ზემოხსენებული საკანონმდებლო ინიციატივა შეიძლება აღქმული იქნას პირდაპირ საფრთხედ საბანკო საიდუმლოების გარანტიებისათვის, რაც თავისთავად წარმოადგენს არა მხოლოდ საქართველოს, არამედ ნებისმიერი ქვეყნის საბანკო სისტემის წარმატების ქვაკუთხედს.
ამგვარი ინიციატივით, სრულიად უსაფუძვლოდ, ნაჩქარევად და დაუსაბუთებლად კიდევ ერთხელ ვაყენებთ დარტყმის ქვეშ ქართულ საბანკო სექტორს, რომელიც წლების განმავლობაში ყველაზე წარმატებული და მდგრადი სექტორი გახლდათ, რომლის პარტნიორები და დამფუძნებლები ხშირად მსოფლიოს წამყვანი საერთაშორისო ფინანსური ინსტიტუტები არიან და რომელთა მეშვეობითაც ქვეყანაში ბოლო წლების განმავლობაში ასეულობით მილიონი დოლარის ინვესტიციის მოზიდვა მოხერხდა.
პარლამენტში მომზადებული საკანონმდებლო ინიციატივა მხოლოდ საბანკო სისტემას არ უქმნის პრობლემას, ის დიდწილად აზიანებს ქვეყნის ბიზნეს და საინვესტიციო გარემოს, რომლის ფორმირებას ხშირად წლები და ათწლეულები სჭირდება.
ჩვენ იმედი გვაქვს, რომ შესაბამისი გადაწყვეტილებების მიღებამდე, კიდევ ერთხელ მოხდება შექმნილი ვითარების სრული საფუძვლიანი ანალიზი, რათა თავიდან აცილებულ იქნას ნაჩქარევი გადაწყვეტილებების მიღება და პრობლემების გადაჭრისათვის მოიძებნოს სხვა რაციონალური გზები.