„ნათს ინქორფორეითიდ“ საქართველოს ბიზნეს ასოციაციის წევრი გახდა

3 ივნ '24

ქვეყანაში ერთ-ერთი უმსხვილესი  აგროკომპანია „ნათს ინკორფორეითიდ“ საქართველოს ბიზნეს ასოციაციის წევრი გახდა.

აღსანიშნავია, რომ კომპანია 2018 წელს დაარსდა და  დასავლეთ და აღმოსავლეთ საქართველოში ნუშის და თხილის ბაღები დაახლოებით 3000 ჰექტარზე გააშენა  და განავითარა.

კომპანია დასავლეთ საქართველოში 2200 ჰექტარზე 10-12 წლიან თხილის ბაღებს ფლობს, ხოლო აღმოსავლეთში სამი წლის განმავლობაში, 800 ჰექტარზე, ეტაპობრივად გააშენა ნუშის ბაღები.

კომპანია უახლესი სასოფლო-სამეურნეო ტექნოლოგიების გამოყენებით,  ექსპორტისთვის აწარმოებს პრემიუმ ხარისხის ნუშსა და თხილს და უზრუნველყოფს საიმედო მიწოდებას.

„მივესალმებით „ნათს ინქორფორეითიდს“ საქართველოს ბიზნეს ასოციაციაში. ეს არის აგროკომპანია, რომელმაც დროის საკმაოდ მოკლე მონაკვეთში მოახერხა ბაზარზე პოზიციონირება და პროდუქციის ექსპორტზე გატანა, რაც მნიშვნელოვანია, როგორც თავად სექტორისთვის ასევე ქვეყნის ეკონომიკისთვის. სასოფლო-სამეურნეო საკითხები ერთ-ერთი პრიორიტეტია ბიზნეს ასოციაციისთვის, რაზეც საკმაოდ აქტიურად მუშაობს შესაბამისი კომიტეტი. დარწმუნებული ვართ, რომ ჩვენი თანამშრომლობა პროდუქტიული და სექტორისთვის შედეგის მომტანი იქნება“ განაცხადა საქართველოს ბიზნეს ასოციაციის პრეზიდენტმა სოსო ფხაკაძემ.